ثورة شاملة في التتش”.. الأهلي يرفض “المدير الرياضي” ويخطط لمنصب أجنبي جديد لإنقاذ الكرة.. و”ييس توروب” يرحل رسمياً !
“ثورة شاملة في التتش”.. الأهلي يرفض “المدير الرياضي” ويخطط لمنصب أجنبي جديد لإنقاذ الكرة.. و”ييس توروب” يرحل رسمياً بنهاية الموسم بعد صدمة أفريقيا!
كشف مصدر مسئول داخل النادي الأهلي إن الإدارة صرفت النظر تماماً عن فكرة تعيين “مدير رياضي” أجنبي زي ما كان بيتردد، وأكد إن الموضوع ده مش مقبول جوه مجلس الإدارة ومخرجش بره مجرد اقتراحات اتقفلت في وقتها. لكن المفاجأة الحقيقية إن الأهلي بيدرس دلوقتي فكرة “بره الصندوق”، وهي الاستعانة بمدير فني أجنبي صاحب اسم كبير وتاريخ، بس مش عشان يدرب الفريق الأول، لا ده عشان يرأس “منظومة كرة القدم” بالكامل في النادي، ويكون هو حلقة الوصل والمنسق العام بين قطاع الناشئين والفريق الأول، في محاولة لخلق هوية كروية موحدة للنادي من تحت لفوق.
الفكرة دي هدفها الأساسي إن الخبير الأجنبي ده يحط “سيستم” يربط المواهب الصغيرة بالفريق الكبير، ويشرف على تطوير المناهج التدريبية في القطاع عشان اللعيبة تطلع جاهزة فنياً وبدنياً، وده منصب مختلف خالص عن شغل المدير الفني للملعب. الإدارة شايفة إن وجود “رئيس منظومة” أجنبي هيحل أزمات كتير كانت بتواجه النادي في تصعيد الناشئين أو اختيار الصفقات اللي تناسب طريقة لعب الأهلي، وهيكون له أدوار واسعة جداً في رسم خريطة الكرة في الجزيرة لسنوات قدام، والموضوع دلوقتي قيد الدراسة العميقة قبل ما ياخد الصبغة الرسمية.
وفي نفس السياق، حسم النادي الأهلي قراره النهائي بخصوص المدير الفني الحالي، الدنماركي ييس توروب، حيث سيتم توجيه الشكر ليه والرحيل رسمياً بنهاية الموسم الجاري. قرار الإطاحة بتوروب جه بعد خيبة الأمل الكبيرة والخروج من ربع نهائي دوري أبطال أفريقيا قدام الترجي التونسي، والمصدر وضح إن الإدارة كانت عايزة تمشيه من وقتها، لكن “خناقة” الشرط الجزائي هي اللي أجلت القرار لنهاية الموسم، ليبدأ الأهلي رحلة البحث عن مدرب “سوبر” يقود الفريق في الموسم الجديد ويصحح المسار القاري اللي اهتز الفترة الأخيرة.
