الأهلي يرفع راية العصيان.. توروب خارج الحسابات وتقاريره في مهب الريح
“المدرب خارج الحسابات”.. إدارة الأهلي تعلن العصيان على توروب وترفض تقاريره الفنية في ميركاتو 2026!
كشفت مصادر من جوه القلعة الحمراء عن “شرخ” كبير في العلاقة بين إدارة النادي الأهلي والمدير الفني الدنماركي ييس توروب، بعد ما قررت الإدارة رسمياً تجاهل كل التوصيات الفنية اللي قدمها المدرب بخصوص مستقبل اللعيبة في الفترة الجاية، المصادر أكدت إن الإدارة بدأت تفرض رؤيتها الخاصة في ملف الصفقات الجديدة والراحلين، وشايفة إن القرارات الاستراتيجية للفريق لازم تكون في إيد النادي مش في إيد جهاز فني بيمر الفريق تحت قيادته بأسوأ حالاته الفنية، وبات رحيله عن “التتش” مسألة وقت مش أكثر بعد ضياع هيبة المارد الأحمر في ماتشات كتير الموسم ده.
الإدارة الحمراء استقرت على إن تقرير “توروب” بخصوص استبعاد بعض الأسماء بنهاية الموسم “موش هيتفتح أصلاً”، ولا هيتم النظر لطلباته في الصفقات الجديدة، وده بسبب حالة عدم القناعة التامة بمستواه كمدير فني فشل في تطوير الأداء أو الحفاظ على هوية الأهلي، الإدارة شايفة إن توروب اللي “ماشي ماشي” بنهاية الموسم ملوش حق يحدد مصير استثمارات النادي في اللعيبة أو يمشّي لعيبة الإدارة شايفة إنهم أعمدة أساسية للفريق، وقررت إنها تمشي في اتجاه مغاير تماماً يحافظ على استقرار الفريق بعيداً عن حسابات المدرب الدنماركي اللي فقد السيطرة على غرفة اللبس.
الخطة دلوقتي في الأهلي هي إعادة ترتيب الصفوف بمعرفة “لجنة التخطيط” والإدارة بس، وبدأوا يدرسوا ملفات اللعيبة والتعاقدات الجديدة وفقاً لرؤية النادي الفنية والمالية، ومن غير أي تدخل من توروب وجهازه المعاون، الخطوة دي بتأكد إن إدارة الأهلي بدأت فعلياً مرحلة “ما بعد توروب” وبتحضر للفريق الجديد اللي هيستلمه مدرب تاني يقدر يرجع البطولات للجزيرة، وبكدة بقى توروب في أيامه الأخيرة مجرد “مدير فني صوري” ملوش كلمة في رسم ملامح “أهلي 2026″، والتركيز كله دلوقتي على حسم الصفقات اللي الإدارة شايفة إنها الأنسب لقميص النادي.
