هيثم فاروق يشعل الاستوديو: بالحب تُوزَّع الكرة الذهبية!” معلقاً هؤلاء النجوم اساطير ف فريقهم يتعدوا اساطير الاهلي

كابتن هيثم فاروق قاعد في الاستوديو بيوزع جوائز ال Ballon d’Or على طريقة ماجد الكدواني في فيلم الفرح وهو بيقول بالحب بالحب بالحب.

قالك ناصر منسي أفضل مهاجم في مصر بشهادة المنافسين طيب هل أفضل مهاجم في مصر ده هداف الدوري مثلا ! . لا ده هداف الدوري لاعب جناح من الأهلي و ب ٩ أهداف . احمد ياسر ريان ٨ أهداف ، أسامة فيصل ٧ أهداف ، صلاح محسن ٧ أهداف . ناصر منسي ترتيبه رقم ٨ في هدافين الدوري ب ٦ أهداف. فهو ممكن يكون أفضل مهاجم في الزمالك وعند جمهور الزمالك وده حقهم انما ليه تحط على لسان جمهور المنافسين ان ناصر منسي افضل مهاجم في مصر !

بعدها قال بيزيرا أفضل جناح في الدوري وربنا عوضنا بيه عن أحد اللاعبين . خوان بيزيرا ترتيبه في هدافين الدوري ال ٦٥ برصيد هدفين وترتيبه في صناعة الأهداف رقم ١٨ صنع ٣ أهداف يعني ٥ مساهمات في الدوري كله في الوقت اللي في أسوأ مستويات الأهلي ونتائج الأهلي أحد اللاعبين ده عنده ٨ مساهمات في الدوري وأنا هنا بقيس على البطولة اللي الفريقين بيشاركوا فيها. لان مقدرش اقارن ارقام لاعب بيلعب في بطولة زي دوري الأبطال بأرقام لاعب في الكونفدرالية لإن المستوى التنافسي مش واحد

فأنا معنديش مشكلة ان كابتن هيثم فاروق يقول ان ناصر ماهر وبيزيرا الأعظم في تاريخ الزمالك دي حاجة تخصه كزمالكاوي انما الأفضل والأحسن والأعظم وأي حاجة على وزن أفعل وحط جنبها كلمة في مصر أو الدوري دي خيالات في عقله هو كزمالكاوي ومش موجودة في أي أرقام